1993 ఆర్పిఎస్ స్కేళ్ళు అమలువరకు ప్రతి వేతన సవరణ ఉత్తర్వులలో సీనియర్ ఉద్యోగులు/ఉపాధ్యాయులకు వార్షిక వేతనాభివృద్ధి తేదీని జూనియర్తో సమానంగా ముందుగా పొందుటకు ప్రీపోన్మెంటు సదుపాయం కల్పించబడింది. తదుపరి 1999, 2005 ఆర్పిఎస్ ఉత్తర్వులలో ఇట్టి సిఫారసులు లేని కారణంగా రివైజ్డ్ పే స్కేల్లో వేతన నిర్ణయం కారణంగా జూనియర్ల కంటే సీనియర్లు ఆలస్యంగా ఇంక్రిమెంటు పొందటం జరుగుతున్నది.
పిఆర్సి 2010 సిఫారసులలో ఈ అసంబద్ధతను తొలగిస్తూ ప్రీపోన్మెంట్ సౌకర్యం వర్తింప చేయబడింది. దీని అమలు వలన ఒకే కేడర్లో పని చేస్తూ సీనియర్, జూనియర్ ఉపాధ్యాయులకు తేది. 1.7.08 నాటికి ఒకే స్టేజిలో వేతన నిర్ణయం జరిగి తదుపరి జూనియర్ వార్షిక యింక్రిమెంటు తేది సీనియర్ వార్షిక యింక్రిమెంట్ తేది కంటే ముందుగా ఉన్నట్లయితే జూనియర్ యింక్రిమెంట్ తేది నాటికే సీనియర్కు కూడా యింక్రిమెంటు మంజూరు చేయబడుతుంది.
ఉదా:జూనియర్: 2002 డిఎస్సి ద్వారా నియామకం పొందిన ఒక ఎస్జిటి అక్టోబర్ 2004లో రెగ్యులర్ స్కేలు వేతనం రూ. 5470/- పొందినాడు. ఆర్పిఎస్ 2010లో అతని వేతనం రూ. 10900/-లుగా నిర్ణయించబడుతుంది. తదుపరి ఇంక్రిమెంట్ తేది. 1.10.08 నాటికి వేతనం రు. 11200/-లుగా వృద్ధి చేయబడుతుంది.
సీనియర్:2001 డిఎస్సి ద్వారా నియామకం పొందిన ఒక ఎస్జిటి జనవరి 2002న సర్వీసులో చేరి జనవరి 2004లో వేతనం రూ. 5470/-గా నిర్ణయించ బడుతుంది. వీరికి ఆర్పిఎస్ 2010లో తేది. 01.07.08నాడు వేతనం రూ. 10900/-లుగాను, తదుపరి ఇంక్రిమెంట్ తేదీ జనవరి 2009న రూ. 11200/-గాను నిర్ణయించ బడుతుంది.
పై ఉదాహరణలో సీనియర్ అయిన ఉపాధ్యాయుడు, జూనియర్ ఉపాధ్యాయుని కంటే 3 నెలలు ఆలస్యంగా ఇంక్రిమెంట్ పొందుతున్నాడు. ప్రస్తుత ప్రీపొన్మెంట్ ఉత్తర్వుల మేరకు సీనియర్ ఉపాధ్యాయుని ఇంక్రిమెంట్ తేదీ జనవరి నుండి జూనియర్ ఉపాధ్యాయుని ఇంక్రిమెంట్ తేది అక్టోబర్కి ప్రీపోన్ చేయబడుతుంది.